MANDOK MAULIATE HASUHUTON ULAON DOK NI ROHA DUNG SIMPUL ACARA MARRIA RAJA

 Mauliatema di Tuhanta pardenggan basai dibornginon dinapatupa acara marria raja. Ima di nanaeng  patotahon acara partuatni ina sian tonga-tonga nami. Ima dinaung lao manopot Tuhanta.

Dison hami si Raja Ompusunggu mandok mauliate godang parjolo tu hamu dongan sahuta nami, ama nami ina nami. Nunga tung denggan ditutur-tuturi hamu hami. Laho mangalusi hula-hula, tulangta saluhutna. Mauliate godangma di hamu. Tontongma diramoti Tuhanta. Jala tontongma dihamu dilehon Tuhanta hahipason. Marsogot pe rap ma hita lao patupa acara songon naung tahatai dibornginon. Songon ima hata nami tu hamu rajani dongan sahuta nami, amanami dohot inanami.

Tuhamu hula-hula nami dohot tulang nami saluhutna. Mandok mauliate malambok pusu do hami tu adopan muna rajani hula-hula, rajani tulang nami dohot di sudena hamuna. Nunga tung massai uli, lengket denggan ni basamuna dipatuduhon hamuna tu hami pamoruan muna, beremuna. Ima di naung borhat ina sian tonga-tonga nami, borumuna.

Tutu dang tarulahon hita i, songon natahatai dibornginon. Asa mangido tangiang hita marhite hamu hula-hula nami dohot tulang nami tu Debata pardenggan basai. Asa tung dipatiur acarata marsogot. Lao pataruhon ina natahaholongion tu inganan parsatokkinani. Sahali nai Tuhanta ma namambaloshon saluhutna nauli nadenggan napinasahat muna dibornginon. Asa boi tutu uli marsogot tapatupa acarata.

Nang dihamu amanami inanami sian huria. Mauliate disude angka nanaeng sipasahaton muna nalaho patupaonta marsogot. Mulai sian namamungka sahat tunapataruhon tu udean.  Hamudo amanami dohot inanami nasian huria disi laho namamungka dohot paujungkon. Mauliate ma dihamu. Tongtongma dilehon Tuhanta dihamu hahipason, amanami inanami pandita, pangula  ni huria dohot sude ruas namanghaholongi hami.

Songonima nang di pamoruon nami, berenami. Mauliate godangma dihamu saluhutna. Mauliatema disude pangurupion muna. Tuhantama namambaloshon nauli nadenggan napinatupa muna.

Songonima nang dihita saluhutna dongan tubu nami. Hahadoli, anggidoli. Mauliate godangma dina rap hita laho paadop-adop hula-hulanta, dongan sahutanta dohot sude nataontang dibornginon. Anggiat ulaonta marsogotpe boi tupa  mardalan uli dohot denggan.

Tuhanta Debata Jahowa ma napasauthon sude ulaonta marsogot. Dipatiur angka pardalanan sian manogot sahat tu napaujungkon. Sahali nai mauliate godangma dihita saluhutna. Debatama namasu-masu hita. Songonima naboi hupasahat hami. 

Botima

Read More

MANDOK MAULIATE ACARA MANGAPULI

Tongtongma hita tutu mandok mauliate godang tu Tuhanta parasi rohai. Natongtong mangaramoti jala mamasu masu hita saluhutna. Boi hita borhat sian bagasta be sahat tubagas namion tongtongdo hita dibagasan hahipason.

Mauliate godang malambok pusudo dipasahat rohanami tu hita saluhutna punguan parsahutaon “satahi saoloan”. Diholong ni rohamuna, ditangiang muna tu keluarga nami. Tarida mai tutu. Dinalaho mulak hami tuhuta, tongtongdo dibagasan hahipason. Boi mardalan uli dohot denggan ulaon parsaor matuaon ni dainang nami. 

Nang dinalaho mulak hami tubagas nami dipangarantoan on, tongtongdo dipasu pasu jala diiring-iring Tuhan. 

Sahat tu partingkianon tongtongdo dipatuduhon hamuna holongni roha muna. Ro hamu marneang ni langka tubagas namion. Mamangkulingi hami, pasahatton hata togar-togar, pasahatton hata nauli nadenggan.

Alanii tamado hami mandok mauliate godang tu hita saluhutna. Anggiatma tutu di hata togar-togar, hata nauli nadenggan napinasahat muna tu hami. Tuhanta Debata parasi roha ima napasauthon.

Nang dipunguanta onpe “punguan parsahutaon satahi saolooan”. Tuhanta Debatama namamasu-masu, anggiat tu ari nanaeng ro boi hita marpungu, marsaor muse dibagasan las ni roha.

Nang dinalaho mulakpe hita annon sian bagas namion. Tuhantama namangiring iring sahat tubagastabe. Songonima hata mauliate naboi hupasahat hami. 

Botima.

Read More

MANDOK HATA MARHABOT NI ROHA / ULAON MONDING

Tama do hita mandok mauliate tu Tuhanta pardenggan basai. Ala dipasu-pasu jala diiring-iring do hita. Boi hita marpungu dipartingkian on dibagasan hahipason nang pe hita marhabot ni roha. Tu hamu keluarga natininggalhon ni inang natahaholongion ima namboru namion. 

Dison jongjong do hami nadohot do hami marhabot ni roha diparlao ni namboru namion. Tutu mansai lungun jala dokdok do roha molo ditinggalhon nahinaholongan ni roha. Lumobi nunga lao be ibana saleleng ni lelengna mandapothon Tuhanta. Alani gomosma hita martangiang. Anggiat dijalo ibana parjambar disurgoi. 

Jala tu hamu keluarga natininggalhon ni namboru namion. Tujoloan ni arion dilehon dihamu gogo laho mandalani ngolu-ngolu muna. Sude holso ni roha muna pasahat hamuma tu Tuhanta. Gomosma hita martangiang tu Tuhanta. Ai Tuhanta do pangapul nasumurung. Alani anggiatma tumibu tarapul roha muna. 

Asa dohonon ma songon hatani situa-tua. 

" Rambani sipoholon marduhut-duhut sitata. Tung boha pe lungun ni sitaonon. Tongtongma tapuji Tuhanta Debata. "

" Asa dolokni Simalungunma parsobanan ni Simamora. Sai salpuma sian hamu nalungun, hatop maro silas ni roha. "

Songonima hata naboi hupasahat hami. Mauliate.

Read More

Mandok Hata Tu Keluarga Namarhabot Ni Roha

 

Mauliatema dihita saluhutna namangalehon partingkian tu hami. Mauliate ma nang di Tuhanta parasi rohaI. Namangalehon dihita hahipason, boi hita marpungu ima dinapaadop-adop ama naung jumoloon.

Dihamu keluargani ama natahaholongion ima naung jumoloon. Dison jongjong do hami ima sian punguan ama ni gerejanta. Nadohot do hami marhabot ni roha ima diparlaoni ama naung jumoloon.

Dang tahi dohot pangidoanta. Sangkap ni Debata do ianggo nasaut. Molo sian pardagingon tutu massai lungun, dangol jala dokdokdo roha molo marsirang sian keluarga. Lumobi nunga lao be ibana saleleng ni lelengna manopot Tuhanta.

Tangiang nami anggiatma ama naung jumoloon dijalo Tuhanta parjambar ditangan siamunNa. Nang tu sude keluarga natininggalhon ni ama naung jumoloon margogoma disitaonon nadokdokon. Dilehon hahipason, dilehon ganjang ni umur.

Disude holso dohot lungun ni roha muna tu Tuhanta ma pasahat hamu. Jala anggiat tibu tarapul roha muna. Anggiatma marhite hata apul-apul, ende puji-pujian tarlumobi tangiang naung tapasahat tu Tuhanta parasi rohai. Tuhantama sude pasauthon i.

Nang diangka ulaon nahombar tu partuatni ama naung jumoloon boi singkop uli dibagasan dame. Jadi saulak nai dohonon nami. Nadohot do hami marhabot ni roha diparlao ni ama naung jumoloon. Songon pangungjungi ni hatanami dohononma songon hatani situa-tua:

“ Rambani Sipoholon marduhut-duhut sitata; Tung bohape lungun jala dokdokni sitaononta tongtongma tapasahat tu Tuhanta Debata. “

“ Asa dolokni Simalungunma parsobananni Simamora; Salpuma sian hamu nalungun, sai tibuma ro angka silas ni roha. ”

Songonima hata naboi pinasahat. Botima.

Read More

Hata Mangampu Ulaon Saor Matua

Parjolo sahali mandok mauliate ma hita tu Tuhanta namartua Debata. Ala asi dohot denggan ni basana do natontong mangaramoti hita. Boi hita pajumpang dibagasan hahipason ima diulaon nami, diparsaor matuaon ni natua-tua namion.

Nahuparsangapi hami hamu rajani dongan tubu, rajani boru, bere, ibebere, rajani ale-ale dohot diangka punguan-punguan. Nahuparsangapi hami hamu rajani hula-hula nami, rajani tulang nami. Saluhutna hamu amanta raja inanta soripada, naso tarjou hami marsada-sada. Tarlumobima di hamu pangula ni huria nami.

Hami sian bona ni hasuhuton mandok mauliate godang tu haradeon ni roha muna. Na ro hamu diapala partikkian on.

Ditadingkon hamu diangka naringkot i diparngoluan muna. Dilean hamu tingki muna naargai. Ro mangadopi parsaor matuaon ni natua-tua namion. Disialanido di amanta raja inanta soripada mandok mauliate godang do hami tu hamuma saluhutna.

Sai anggiat ma attong Tuhanta na mambaloshon i. Dilehon Tuhantama dihamu habisuhon, hahipason dohot ganjang ni umur. Mauliatema diangka hata pasu, hata gabe, hata horas, hata pangapulion, hata togar-togar. Tarlumobima tangiang tu Tuhanta napinasahat muna. Sai anggiat mai attong dijangkon partondian nami.

Hami sian bona ni hasuhuton mandok mauliate-mauliate ma di hamuna saluhutna. Dibagasan serep ni roha dohonon nami ma songon hatani situa-tua.

Asa gala-gala sitellung-tellung mardagul-dagul. Molo tung adong hahurangan nami, manjangkon hamu saluhutna angka nahugokkon hami. Nanget-nangetma amanta raja inanta soripada mangapul-apul.

Sai anggiat ma attong hata pasu, hata gabe naung pinasahat muna. Ampe mai di sibubuan nami, tuhuk diabara nami, appu di appuan nami.

Asa dohononma songon hata pangampuan nanidokni situa-tua.

Asa turtuma ninna anduhur tio ninna lote. Hata nauli, hata nadenggan naung pinasahat muna. Sai unangma muba, sai unangma mose.

Asa tikkoma inggir-inggir, bulung nai rata-rata. Hata pasu, hata gabe naung pinasahat muna. Sai dipasauthon Tuhanta namartua Debatama.

Asa horbo sitikko tanduk tu sisapang naualu. Parbutuha mangalilit parmata mangalu-alu. Dibalian mai attong marjampal, dihuta marngalu-ngalu. Hata pasu, hata gabe, hata parhorasan naung pinasahat muna tu hami bonani hasuhuton. Huampu hami mai hot martonga ni jabu. 

Asa sahat-sahat ni solu sahat ma tu bontean. Nunga sahat attong ulaon parsaor matuaon ni natua-tua namion dibagasan sadarion. Sai sahat ma hita attong leleng mangolu. Jala horas-horas dipasu-pasu Tuhan Debata.

Mauliate. Botima

Read More

MANDOK HATA MARHABOT NI ROHA

Tama do hita mandok mauliate tu Tuhanta pardenggan basai. Ala dipasu-pasu jala diiring-iring do hita. Boi hita marpungu dipartingkian on dibagasan hahipason nang pe hita marhabot ni roha. Tu hamu keluarga natininggalhon ni inang natahaholongion ima namboru namion. 

Dison jongjong do hami nadohot do hami marhabot ni roha diparlao ni namboru namion. Tutu mansai lungun jala dokdok do roha molo ditinggalhon nahinaholongan ni roha. Lumobi nunga lao be ibana saleleng ni lelengna mandapothon Tuhanta. Alani gomosma hita martangiang. Anggiat dijalo ibana parjambar disurgoi. 

Jala tu hamu keluarga natininggalhon ni namboru namion. Tujoloan ni arion dilehon dihamu gogo laho mandalani ngolu-ngolu muna. Sude holso ni roha muna pasahat hamuma tu Tuhanta. Gomosma hita martangiang tu Tuhanta. Ai Tuhanta do pangapul nasumurung. Alani anggiatma tumibu tarapul roha muna. 

Asa dohonon ma songon hatani situa-tua. 

Rambani sipoholon marduhut-duhut sitata. Tung boha pe lungun ni sitaonon. Tongtongma tapuji Tuhanta Debata.

Asa dolokni Simalungunma parsobanan ni Simamora. Sai salpuma sian hamu nalungun, hatop maro silas ni roha.

Songonima hata naboi hupasahat hami. Mauliate.

Read More

Hata Huhuasi Pamasu-Masuon Di Gareja Sian Suhut Paranak

Link Video Youtube Hata Huhuasi Pamasu-Masuon Di Gareja Sian Suhut Paranak

Syalom.

Horas ma di hita saluhutna. 

Parjolo sahali mandok mauliate godangma hita tu amanta namartua Debata. Ala asi dohot holong ni rohana do boi hita pajumpang ima dibagas joro ni Tuhanta on dibagasan hahipason.

Ima tutu di naung manjalo pasu-pasu pardongan saripeon ianakkon nami dohot parumaen nami sian Tuhanta. Hombar disi hami sian hasuhuton paranak. 

Mandok mauliate godang ma tu hamuna amang Pandita, parhalado suang songoni ruas ni huriata on. Di panghobasion muna, dinamanguluhon ima acara pamasu-masuon ni ianakkon nami dohot parumaen nami.

Anggiat ma tutu nasida gabe rumah tangga sitiruon, siboan las ni roha diadopanta. Tarlumobina diadopan ni Tuhani. 

Dihamu nahuparsangapi hami rajani dongan tubu, rajani boru, bere, ibebere, rajani pariban, rajani dongan sahuta, rajani ale-ale. Tarlumobina di hamuna saluhutna rajani hula-hula dohot tulang nami. 

Suang songinama dihamu rajai hula-hula naniambangan nami rap dohot uduranna.

Mandok mauliate godang ma hami tu hamu saluhutna diharoro muna dibagasan partikkian on. 

Raja nami dung sikkop hita sian bagas joro ni Tuhanta on. Rap udur ma hita. Ima tu pogu ni alaman nami. Disi ma hita mangan indahan na las dohot minum aek sitio-tio. Huhut manjalo dohot pasahat adat nahombar di sihabatahonta i.

Songonima hata huhuasi sian hami. 

Gabema jala horas.

Read More

Hata Mangampu Ulaon Habot Ni Roha

Mauliate ma amang raja inang soripada naung pinasahat muna tu hami. Tutu dipataridahon hamu do holong munai diparmonding ni natua-tua namion. Dilehon hamu do tutu angka hata togar-togar, hata pasu, hata gabe. Jala salpu ilu manetek sian simalolong nami. Salpu nalungun sian bagas roha nami.

Suang songoni di hamu angka rajani hula-hula nami. Saluhutna dohot tulang nami. Mauliatema diangka naung pinasahat munai, parhitean ni pasu-pasu munai.

Anggiatma martinangi marbinege tutu amanta namartua Debata. Di angka tangiang munai tujoloan niarion di hami pargellengon munaon. Jumpangan nami diangka tangiang munai ima angka si las ni roha.

Amang raja inang soripada dohonon nami ma songon pandokni situa-tua : 

“ Asa horbo sitikko tandukma tu sisapang naualu, parbutuha mangalilit parmata mangalu-alu. Dibalian ma i attong marjampal, di bara ni jabu marngalu-ngalu. Di angka hata poda napinasahat munai tuhami. Suang songoni tangiang dohot pasu-pasu. Jujung mai di simanjujung, tuat tu abara, abing diabingan nami. Ampuan nami mai hot martonga ni jabu. Gabe bohal nami mandalani angka ngolu-ngolu.   ”

“ Asa habang siruba-ruba songgop didangka ni hapadan. Hata dohot poda napinasahat muna. Dijangkon partondion nami mai nang dohot badan ”

Songonima hata naboi hupasahat hami. Mauliate

Read More

Mandok Hata Dongan Sahuta Di Pesta Unjuk

Mauliatema parjolo tapasahat tu Tuhanta perdenggan basai. Namangalehon dihita tiur ni ari. Marlas ni roha hita tarlumobima dihamu amang inang hasuhuton. Di las ni rohanta sadarion ima di naung manjalo pasu-pasu pardongan saripeon ianakhon muna, ianakhonta.

Dison jonjong do hami dongan sapunguan muna. Ima punguan STM ta. Dohonon nami ma.

Andor hadukka ma togu-togu ni lombu, andor hatiti togu-togu ni horbo. Penggeng saor matua ma hamu amang inang patogu-togu pahompu. Sahat tu namarnini sahat tu namarnono dipasu-pasu Tuhan Debata.

Suang songonima nang tu ianakhonta. Selamat menempuh hidup baru ma tu hamu ate. Tangiang nami asima roha ni Tuhanta sai anggiatma hamu gabe keluarga sitiruon, keluarga namamuji pasangap Tuhani. Dilean dihamu lambok niroha dohot lambas ni roha di namangalugahon ruma tangga muna.

Dipasu-pasuma pardalanan ni rumah tangga muna dibagasan dame dohot las ni roha. Boi hamu satahi saoloan tudolok nang tu toruan. Jumpang ma di hamu songon pandohan ni natua-tua.

Ruma ijuk paadop-adop ruma gorga. Sai tubuma dihamu anak nabisuk dohot boru namora jala nalambok marroha.

Sahat-sahat ni solu sahatma tu bontean tongon dirondang ni bulan. Sahatma hita saluhutna tu panggabean jala sahatma tu parhorasan.

Jadi ala sian STM do hami najonjong on. Adongdo naung tasepakati songon anggaran dasar ni STM ta. Pasahaton nami mai tu hamu amang inang di tingkion. 

Molo tung pe sosadia i naung tasepakati i. Las ma rohamu manjalo. Songon nidokni natua-tua.

Sititima sihompa golang-golang pangarahutna. Otik sosadia pe napinasahat ni STM ta amang inang. Las ma rohamu manjalo. Sai Tuhanta ma namanggohi pasu-pasuna.

Songonima sahat ni hata nami di partingkian on.

Mauliate

Ala naeng pasahaton nami ma silua nami, baen damang ma musik nahombar tusi.

Read More

Mandok Hata Huhuasi Di Gareja Sian Suhut Paranak

Syalom

Horas ma di hita saluhutna.

Parjolo sahali mandok mauliate ma hita tu amanta namartua Debata. Ala asi dohot holong ni rohana do, natontong mangiring-iring hita.

Boi hita pajumpang dibagasan hahipason dibagas joro ni Tuhanta on. Ima dinamanjalo pasu-pasu pardongan saripeon anak nami dohot parumaen nami sian Tuhanta marhite naposona.

Alani tama do hami parjolo sahali mandok mauliate di hamu amang pandita, parhalado dohot ruas ni hurianta on. Di panghobasion muna. Boi mardalan ulaonta sadarion dohot denggan dibagasan las ni roha.

Anggiat ma attong anakkon nami dohot parumaen nami, gabe rumah tangga natarpasu-pasu, rumah tangga sitiruon, siboan las niroha dihita, tarlumobima dijolo ni Tuhantai. 

Alani mandok mauliate ma hami tu hamu amang pandita, parhalado, pangula ni huria dohot ruas ni hurian ta on.

Suang songonima dihamuna raja ni dongan tubu nami, rajani dongan sahuta, raja ni pariban, boru, bere, ibebere, ale-ale dohot dihamu amanta raja dohot inanta soripada. 

Tarlumobima di hamu saluhutna raja ni hula-hula, tulang, bona tulang, bona ni ari dohot tulang rorobot nami.

Diharadeon ni roha muna. Naro mandohoti ulaon pamasu-masuonni anak nami dohot parumaen nami dipartikkian on. Mandok mauliate do hami diharoro muna. 

Suang songonima di hula-hula nami naniambangan rap dohot uduranna. Mauliate ma hupasahat hami tu hamu rajanami.

Dung sikkop hita sian bagas joro ni Tuhanta on. Rap udurma hita tu pogu ni alaman nami songon sikkat ni bagas nami di gedung naung huparade hami. 

Disima hita mangan indahan na las dohot minum aek sitio-tio, huhut pasahat adat dohot manjalo adat nahombar tu ulaoni.

Sai anggiat ma tutu ulaonta sadarion boi mardalan dohot denggan. 

Asa dapot ma  songon hatani situa-tua.

“ Napuran sangkababama niatup ni boru toba. Anggiat ma marhite ulaonta sadarion. Manghorhon sangap ma di Tuhanta, jala manghorhon las ni rohama di hita saluhutna.”

Songonima hata sian hami suhut paranak.

Botima

Read More

Hata Sian Tulang Ulaon Pesta Unjuk & Adat Na Gok

Jadi mauliatema diparsaoranta ditingkion, mauliatema nang di Tuhanta. Diari nauli dibulan nadenggan on. Tohoma tutu di lae nami, di naro gokkon dohot jou-jou muna diari naung salpu tu tonga-tonga ni punguanta. Tohoma tutu digokkon dohot jou-jou munai. Ido haroro nami ditingkion. Ido dihita lae dinamarpunguan. Sisada anak sisada boru do hita ditonga-tonga ni punguan.  

Di las ni rohani laeku, las do roha ni punguanta. Anggiatma attong amanta namartua Debata dipasu-pasuma saluhutna. Dileanma ganjang ni umur di laeku. Asa boi parmudu-mudu saluhutna angka berenami. Jadi songon hatani situa-tua ma dohonon nami:

Andor hadukkama ma togu-togu ni lombu, andor hatiti togu-togu ni horbo. Penggeng saur matua ma hamu laeku pairing-iring pahoppu sahat tu na marnini sahat tu na marnono dipasu-pasu Tuhan Debata. 

Jadi dihamu berenami. Tangiang nami anggiatma ruma tangga muna tujoloan ni arion gabe ruma tangga na berbahagia. Ingot hamuma hatani Tuhanta naung dipasahat marhite-hite naposona nangking. Pos ma rohamu molo sada do hamu mangalugahon parruma tanggaon mu. Nasai dapoton muna do pasu-pasu nabalgai sian Tuhanta. Hatopma attong dililiti andorna. Asa martamba-tamba silas ni roha di keluarga muna. 

Jadi dison adongdo diboan hami songon ulos naganjang, ulos nahapal sitorop rambu. On ma tangiang ni punguanta. Pinta-pintata tu amanta namartua Debata. Anggiatma songon ganjang ni ulosonma ganjang ni umurmu tu ari marsogot. Hapalma attong jaloon muna pasu-pasu sian Tuhani. Torop rambuna. Asa sitorop pinomparma hamu tu joloan ni arion. Jadi songon hatani situa-tua ma dohonon nami tu hamu:

Ranting ni arirang peak di tonga ni onan. Badanmu naso sirang, tondi muna ma marsigomgoman.

Asa pinaktikkon ma hujur di topi ni tapian. Tudia pe hamu mangalakka tusima hamu dapotan parsaulian.

Asa sahat-sahat ni solu sahatma tu bontean. Pasahaton namima ulos sian tonga-tonga ni punguanta. Sahatma hamu tuparhorasan, sahatma hamu tu panggabean.

Songonima hata naboi hupasahat hami. Mauliate.

Read More

Hata Mangampu Tu Sipasahat Ulos Tujung

Dihamu hula-hulanami nahuparsangapi hami. Songon hata ni angka omputa sijolo-jolo tubu. Hamu hula-hula do di hami songon mulani mataniari binsar.
Mauliate raja nami jala malambok pusu siala haroro muna dohot pambahenan muna. Na pataridahon holong ni roha muna di inanami namarsitaonon on dohot di angka ianokkon nami. Laos songoni dohot di hami saluhutna natininggalhon ni ama nami na monding on.
Nungnga diampehon hamu ulos tujung diatas simanjujung ni inanami on. Jala dipaboa hamu tanda do i napataridahon holong ni rohamuna. I ma tutu rajanami, toho do i. Jala diparnidaan nami pe. Holan tujungi do na tarida ampe di simanjujung ni ina nami on.
Ianggo na situtuna tangan ni hamu hula-hula nami do na ampe di atas ni simanjujung ni ina nami. Laho mamasu-masu nasida dohot mangondingi sian nasa mara marhite-hite Tuhanta.  
Na gabe ubat sipalambok dohot ubat sipangalumi di inanami on dohot di hami saluhutna.
Tuhani ima na mangalehon marlipat ganda pasu-pasu tu hamu balosni nadenggan nabinahen muna. Mauliate.
Botima.

Read More

MANDOK HATA PASAHAT ULOS SAPUT

Di hamu parboruon nami tarlumobi ma di ibotongku dohot dihamu bere nami namarhaha maranggi. Suang songoni disude hamu namardongan tubu, na dohot do hami tulang muna, nantulang muna dohot ompung muna. Sude hami napungu on marhabot ni roha diparmonding ni lae nami ima ama natahaholongi on.

 

Najolo diparsorang ni lae nami on, dipasahat Tulangna do Ulos Parompa ima songon lampin ni berenami on. Nuaeng nunga monding ibana, ro ma hami Tulangna pasahat Ulos Saputna. Asa dohonon nami ma tu hamu ito dohot tu sude hamu bere dohot ibebereku.

 

Hupasahat hami ma Ulos Saput on tu lae nami naung monding on, dohot pangidoan di tangiang nami tu Amanta Debata parasi roha i. Asa manaputi parhorason, panggabean sian pasu-pasu ni Tuhanta di hamu sude natinadingkon ni laenami on.

 

Borhat ma ho lae mandapothon Tuhan Jesus Kristus di surgo hasonangan i.

(Laos diampehon ma ulos saput i tu na mondingi).

Read More

Hata Mangapuli Tu Dongan Sahuta

Santabi godang di loloan na marhabot ni roha. Mauliate ma di Tuhanta boi do pe hita marpungu di ombason nang pe hita dibagasan habot ni roha. Di hamu inang dison rodo hami dongan sahuta muna patuduhon na sisada sitaonon do hita, ima naung jumolo dialap Tuhanta amanta nahinan sian tonga tonganta.

Huboto Hami do inang, tung mansai borat jala lungun do roha molo ro sitaonon sisongonon. Alai, pos do roha nami na ikkön salpu do sudena i jala tumibu ma hamu inang tarapul.

Hata ni natua tua mandok:

" Sarindan ni pinasa tu napuran tano tano. Na manginjam do di hosa, anggo pamatang ikkon do tu tano. alai anggo tondi mulak do tu Debata nampunasa. "

Sai dipasu pasu jala di ramoti Tuhan ma hamu inang laho marmudu mudu akka dakdanahi. Gomos ma hamu martangiang asa unang lilu roha muna. Tuhani ma bahen hamuna haporusan muna. Dapot ma di hamuna songon nidok ni natua tua.

" Tinapu bulung siarum bahen uram ni pora pora, na hansit i tibu ma malum, jala tibu ro silas ni roha. "

Songonima jolo hata naboi pinasahat. Mauliate

Read More

Mandok Hata Huhuasi Acara Pamasu-masuon Di Gareja Sian Parboru

Link 1 Video Mandok Hata Huhuasi Acara Pamasu-masuon Di Gareja Sian Parboru 

Mauliate ma di Tuhan, mauliate ma nang dihita saluhutna amanta raja dohot inanta soripada. Dison jongjong do hami sian suhut parboru.

Nahuparsangapi hami amang Pandita, Parhalado, Amang Sintua dohot sude na manghobasi ulaon ni hurianta sadari on. Boi tupa dohot denggan dibagasan las ni roha.

Ima ulaon pamasu-masuon ni boru dohot hela nami. Holan hata mauliate do naboi tarpasahat hami amang inang di sude haradeon ni roha dohot panghobasion muna i.

Tangiang nami sai di pasu-pasu Tuhan ma angka panghobasion muna. Dilehon di hamu ganjang ni umur dohot hahipason. Asa lam tu hembangna huriana jala marsangap ma Tuhanta.

Suang songoni ma di hamu raja ni dongan tubu, boru, bere dohot ibebere nami, raja ni dongan sahuta, raja ni ale-ale. Tarlumobima raja ni hula-hula dohot tulang nami saluhut na.

Dung simpul ulaon pamasu-masuon sian gareja on. Asa rap udurma hita tu pogu ni alaman naung pinarade ni parmoruon nami ima di jolo bagas nasida.

Lao manjalo huhut pasahat adat na hombar tu ulaon i. Laos mangan indahan na las dohot minun aek sitio-tio.

Sai didongani jala di iring-iring Tuhanta ma ulaonta sadarion. Dilehon di hita tiur ni ari. Boi hita rap udur marnatampak di mangajana.

Molo tung adong dope naso sahat gokkon sian bona suhut nami, tu amanta raja dohot inanta soripada. Laos on ma sahat ni gokkon sian hami, mewakili bona suhut parboru tu hita saluhut na.

Songonima hata naboi hupasahat hami sian suhut parboru.

Horas ma dihita saluhutna.

Botima.

Read More

Hata Dinapasahathon Ulos Pamarai

 Link Video Hata Dinapasahathon Ulos Pamarai

Di hamu amangboru nami dohot namboru nami dison rodo hami pasahathon ulos herbang, ulos pamarai tu hamu, ulos naganjang, ulos nabidang sitorop rambu.

Dalan nami mai mangido tangiang tu Tuhanta pardenggan basai. Sai ganjangma umurmu, sai dao ma parsahitan. Ulos nabidang maon, sai dilehon Tuhanta ma di hamu bidang angka parsaulian dohot pansamotani.

Asa sai tontong dibagasan hahipason jala dibagasan las ni roha hamu, sauduran angka namarhaha maranggi, marsitungkol-tungkolan songon suhat dirobean disude angka ulaon dohot namasa ditonga-tonga muna.

Ulos sitorop rambu ma ulos on, sai toropma pomparanmu tu joloan on. Jalo hamu ma ulos herbangon amangboru dohot namboru.

Asa songon hata ni situa-tua ma dohonon nami.
" Andor hadumpang ma togu-togu ni lombu, andor hatiti togu-togu ni horbo, sahat tu lapo gambiri. Penggengma hamu saur matua paihut-ihut pahompu sahat tu namarnini tu manarnono. Dipasu-pasu Tuhanta ma hamu. "

Las ma rohamu. Musik.....

Read More

Umpasa Tu Na Marsahit

 Link Video Umpama Tu Na Marsahit

" Napuran sirara uruk peak di pinggan pasu.
Nunga dipangan hamu angka ubat ni sahit.
Sai Tuhanta ma tontong namasu-masu. "

" Hau gala-galama panjangkitan ni si Jakkeus.
Sai dao ma sahit dohot mara,
molo tapasahat ngolunta tu Tuhan Jesus. "

Horas Jala Gabe.

Read More

Pangantusion Tu Suhi Ni Ampang Na Opat Di Pesta Unjuk

 

Read More

Angka Umpasa Di Na Marhata Sinamot Sian Pihak Parboru

 Link Video Angka Umpasa Di Na Marhata Sinamot Sian Pihak Parboru

" Sai jolo dinangnang do asa dinungnung, sai jolo pinangan do asa sinungkun "

" Buruk-buruk ni durung parasaran ni sioto, bangkona do manungkun molo so binoto "

" Danggur ma danggur barat toho tu duhut-duhut ditoru ni singkoru, nungnga bosur hami mangan indahan na las sagat marlompan juhut, ba hatana paboa hamu ma rajani boru "

" Sande sige tu bungkulan ni sopo, bangkona do manise molo sobinoto "

" Dia ma nuaeng langkatna dia unokna, dia ma nuaeng hatana dia nidokna "

" Bagot na marhalto ma na tubu di robean, horas ma hami namanganhon sai martamba sinadongan di hamu na mangalean. "

" Tubu simarhora-hora di topi ni tapian, sai roma tu hamu silas ni roha tiur nang pansarian "

" Bona ni aek puli di dolok ni sitapongan, sai tubu ma di hamu angka na uli, jala sai dor ma nang pangomoan "

" Inganan ni puli di hauma salenggam, sai marangkup do nauli mardongan do nadenggan "

" Ranting ni bulu duri jait masijaotan, angkup ni hata nauli dia ma sitaringotan. "

Read More

Mandok Hata Molo Mandulo Namarsahit

 Link Video Mandok Hata Molo Mandulo Namarsahit

Mauliate ma tapasahat tu Tuhanta pardenggan basai. Ala diramoti jala diiring-iring do hita. Boi hita marpungu di partingkian on.

Jadi dihamu iboto nami. Ro do hami mandulo hamu di partingkian on. Ala hubege hami nasonggop parsahitan tu pamatang muna di ari naung salpu.

Alai Puji Tuhanma. Mauliate ma di Tuhan ala nungga lam sehat hubereng hami pamatang muna dipartingkian on.

Asi ma tutu roha ni Tuhan. Marhite tangianta dipartikkian on. Tu hatopma ma hipas pamatang muna. Margogoma ubat na pinangan muna.

Margogoma sipanganon dohot siinumon na dipangan muna tu hahipason ni pamatang muna. Suang songonima angka medis namanjama. Diparbisuhi Tuhan ma.

Anggiat marbisuk nasida, mambantu pemulihan muna. Asa anggiat ma tutu sahit nadipamatang munai. Tanggal so dihilala hamu, peut so diboto hamu. Asa anggiat hatop hipas hamu.

Asa boi hamu mangulahon angka ulaonmu siganup ari tu joloan ni arion. Tung songoni pe hata naboi hupasahat hami tuhamu. Tuhantama namamasu-masu hita saluhutna.

Botima.

Read More