Dison rodo hami ima napasahatton hata pangapulion tu ina nami nang tu sude keluarga na adong di ingananon. Ima dinaung jumolo marujung ngolu ama natahaholongion. Sitaonon na borat jala nangotngot dijolma na mangolu ima sinirang ni 'hamatean'. Lumobi molo na monding i nahinaholongan ni rohanta. Alai ingot hamu ma inang dang pasombuon ni Debata sai tumatangis hamu, molo pe ngolunta di portibion madabu jongjong alai gumodangan do hita jongjong ala asini roha sian Tuhan i. Sude do hita jolma ingkon mate molo jumpang tingkina. Sada pe sian hita dang adong na boi pasidinghon i. Alai pangidoanta, molo tung marujung pe nian ngolunta sian hasiangan on, asa jolo sahat ma nian hita tu na saur matua. Ima songon pangidoan dohot elek-elekta tu Tuhanta. Jala songon nidok ni umpasa : " Ramba nisipoholon marduhut-duhut sitata. Las ni roha dohot sitaonon sude do sian Amanta Debata. Asa hau ni Gunungtua dangkana mardagul-dagul, tibuma dilehon Tuhanta dihamu tua jala tibu hamu di apul-apul. " Asa holan dibagasan Jesus do jumpang las niroha na manontong, jala Ibana do pasohon ilu-ilu sian mata ni angka na tumatangis, jala na mangalean apul-apul alani parsorion. Antong tapuji ma Debata dingolunta, margogo ma hita jala marpanindangion. Unang be sai lalap diparlalapan. Sai tontong marhaporusan tu Tuhan ni ma hita, ai dang adong naso tarpatupa ni Debata. Jadi di hamu inang dohot sude sisolhot na tininggalhon ni damang na tahaholongi on, pabulus ma roha muna dipanadingkon ni ama na tahaholongi on. Jala nagabe hata ni Debata sitiopan muna ima natarsurat di Pilippi 1:21 ima namandok; “Ai Kristus do hangoluan di au, jala laba do nang hamatean”. Songonima songon hata apul-apul sian hami. Sai anggiat ma tibu tarapul rohamuna. Mauliate.
Senin, 22 September 2025
Mandok Hata Tu Keluarga Na Marhabot Ni Roha
Sabtu, 06 September 2025
Hata Mangampu Sian Bona Hasuhuton Ulaon Saur Matua
Link Video Hata Mangampu Sian Bona Hasuhuton Ulaon Saur Matua
Di amanta raja, inanta soripada naliat nalolo. Di na manghaholongi hami bona ni hasuhuton dibagasan tikkion. Raja nami tulang nabasa. Dihamuna saluhutna horong ni hula-hula dohot tulang nami. Mauliate malambok pusu do pasahaton nami di hamuna.
Di naung tangkas attong hata togar-togar, hata pasu. Naung pinasahat muna tu hami ianakhon muna, tarlumobima di hasuhuton. Suang songonima attong di keluarga ni dainang nami, na tangkas ditinggalhon dainang on dibagasan tingkion. Sai anggiat ma attong martinangi, marbinege amanta namartua Debata. Saluhutna attong dipasauthon ma parbue ni tangiang muna i raja nami. Tarlumobi ma attong dihamuna hula-hula nami, tulang nami, tulang rorobot, suang songoni attong di angka pariban nami na ro mandapothon hami di tingkion. Pasahathon hata togar-togar. Sai anggiat ma attong saluhutnai manogari saluhutna keluarga. Songoni ma attong raja nami dibagasan tingkion. Tung mansai dokdok do attong saluhutna panghilalaan nami, ianakhon muna. Songon udan na so hasaongan, lombang na so boi timbungon, binanga na so boi langean, diparlao ni ina nami dibagasan tingkion. Raja nami tulang nabasa, nang tu hamuna saluhutna tontong do hami marpangidoan tu hamu. Asa gomos boan hamu tong keluarga nami on di tangiang muna. Songonima dihita namardongan tubu. Mauliate do pasahaton nami dihamuna saluhutna dibagasan tingkion. Na tangkas dipatuduhon hamu attong sisada panghilaan do hita dibagasan sadarion. Ima attong diparlao ni dainang on. Na tontong diparsaulihon hamu angka tingki muna na argai dibagasan tingkion. Didongan-dongani hamu hami bona ni hasuhuton. Raja ni dongan tubu, sian Tuhanta ma attong parbueni i dapot muna. Dang tarbaloshon hami i saluhutna. Holan hata mauliate do naboi hupasahat hami. Asa dohonon ma songon hata ni situa-tua : “ Horbo sitingko tanduk, tu sisapang naualu, parbutuha mangalilit parmata mangalu-alu. Dibalianma attong i marjampal, dihuta marngalu-alu. Hata nauli hata nadenggan, natangkas attong pinasahat munai raja bolon. Ampu ma attong, tuhukma tong diampuan nami. “ “ Asa naung sampulu pitu jumadi sampulu ualu. Hata nadenggan natangkas pinasahat muna, jala hata togar-togar na dipasahat hamu dibagasan tingkion. Tangkas ma attong raja nami. Huampu hami martonga ni jabu. “ Horas jala gabema dihamu saluhutna hula-hula, tulang nami, suang songoni dongan tubu. Tarlumobima di hamu dongan sahuta nami. Mauliate godang ma hupasahat hami. Botima.
