Mauliate ma tapasahat tu Tuhanta pardenggan basa siala asi dohot holong ni rohaNa boi hita marhahipason di apala ombason. Dison ro do hami sian punguan ni hula hula muna pasahathon hata pangapulion tu hamu iboto nami nang tu sude keluarga siala naung jumolo dialap Tuhanta lae nami nahinan,
Huhilala roha nami do ito sitaonon na borat jala na dokdok do on di hamuna, alai ingot hamu ma ito dang pasombuon ni Tuhani hamu sai tumatangis sai na ramotanna do hamuna.
Adong do hata ni natua-tua mandok,
" Sarindan ni pinasa tano-tano hapadan. Namanginjan do di hosa, tano do nampuna badan. Alai tondinta mulakdo tu Tuhanta pardenggan basa. "
Alani ondihon hamuna ngolu muna tu Tuhanta. Asa ibana namandongani jala mangaramoti hamuna.
Songon nidokni natua-tua ma dohonon nami:
" Borhatma pangula las hundul digadu-gadu. Taondihonma ngolunta tu Tuhanta pardenggan basa. Asa tibu ro silas ni roha jala hot hita dipasu-pasu. "
" Hau ni gunung tua dangkanai mardagul-dagul. Sai dilehon Tuhanta dihamu tua. Jala tibu hamu di apul-apul. "
Songonima songon hata mangapuli sian hami hula-hula muna.
Mauliate.
Di amanta raja, inanta soripada naliat nalolo. Di na manghaholongi hami bona ni hasuhuton dibagasan tikkion. Raja nami tulang nabasa. Dihamuna saluhutna horong ni hula-hula dohot tulang nami.
Mauliate malambok pusu do pasahaton nami di hamuna. Di naung tangkas attong hata togar-togar, hata pasu. Naung pinasahat muna tu hami ianakhon muna, tarlumobima di hasuhuton. Suang songonima attong di keluarga ni dainang nami, na tangkas ditinggalhon dainang on dibagasan tingkion.
Sai anggiat ma attong martinangi, marbinege amanta namartua Debata. Saluhutna attong dipasauthon ma parbue ni tangiang muna i raja nami.
Tarlumobi ma attong dihamuna hula-hula nami, tulang nami, tulang rorobot, suang songoni attong di angka pariban nami na ro mandapothon hami di tingkion. Pasahathon hata togar-togar. Sai anggiat ma attong saluhutnai manogari saluhutna keluarga.
Songoni ma attong raja nami dibagasan tingkion. Tung mansai dokdok do attong saluhutna panghilalaan nami, ianakhon muna. Songon udan na so hasaongan, lombang na so boi timbungon, binanga na so boi langean, diparlao ni ina nami dibagasan tingkion.
Raja nami tulang nabasa, nang tu hamuna saluhutna tontong do hami marpangidoan tu hamu. Asa gomos boan hamu tong keluarga nami on di tangiang muna.
Songonima dihita namardongan tubu. Mauliate do pasahaton nami dihamuna saluhutna dibagasan tingkion. Na tangkas dipatuduhon hamu attong sisada panghilaan do hita dibagasan sadarion. Ima attong diparlao ni dainang on.
Na tontong diparsaulihon hamu angka tingki muna na argai dibagasan tingkion. Didongan-dongani hamu hami bona ni hasuhuton.
Raja ni dongan tubu, sian Tuhanta ma attong parbueni i dapot muna. Dang tarbaloshon hami i saluhutna. Holan hata mauliate do naboi hupasahat hami.
Asa dohonon ma songon hata ni situa-tua :
“ Horbo sitingko tanduk, tu sisapang naualu, parbutuha mangalilit parmata mangalu-alu. Dibalianma attong i marjampal, dihuta marngalu-alu. Hata nauli hata nadenggan, natangkas attong pinasahat munai raja bolon. Ampu ma attong, tuhukma tong diampuan nami. “
“ Asa naung sampulu pitu jumadi sampulu ualu. Hata nadenggan natangkas pinasahat muna, jala hata togar-togar na dipasahat hamu dibagasan tingkion. Tangkas ma attong raja nami. Huampu hami martonga ni jabu. “
Horas jala gabema dihamu saluhutna hula-hula, tulang nami, suang songoni dongan tubu. Tarlumobima di hamu dongan sahuta nami.
Mauliate godang ma hupasahat hami.
