Umpasa Mangampu

1) Doding ni dodingkon, doding ni mandalasena;

    Pasu-pasu napinasahat munai, sai unang ma muba unang sesa.

2) Naung sampulu sada ma jumadi sampulu tolu; 

    Angka pasu-pasu muna i sai anggiat ma padenggan ngolu-ngolu.

3) Topi ni aek Puli dalan tuhuta Tonga-tonga; 

    Sai sahatma pasu-pasu muna i, unang muba unang longa.

4) Songgop siruba-ruba tu dangka ni hapadan; 

    Angka pasu-pasu muna i sai dijangkon tondima dohot badan.

5) Mardangka jabi-jabi marbulung ia situlan; 

    Angka pasu-pasu munai, sude ma i dipasaut Tuhan.

6) Turtu ninna anduhur tio ninna lote:

    Hata pasu gabe naung pinasahat muna, sai unangma muba sai unangma mose.

7) Pinauli sagu-sagu, binahen tu pinggan pasu; 

    Sude denggan ni rohamu, sai Debatama na mamasu-masu.

8) Habang pidong sibigo, paihut-ihut bulan;

    Saluhut angka natapangido, sai tibuma dipasaut Tuhan.

9) Tinapu bulung nisabi, baen lompan ni pangula;

    Sahatma pasu-pasu na nilehon muna i tu hami, Sai horas ma nang hamu hula-hula.

10) Mardakka Jabi-jabi, marbulung ia si Tulan;

    Angka pasu-pasu napinasahat muna, sude mai dipasaut Tuhan.

11) Marmutik ma inggir-inggir, bulung nai rata-rata;

    Hata nauli, hata pasu napinasahat muna, napasauthonma amanta namartua Debata.

12) Tingko ma inggir-inggir bulung nai rata-rata;

    Hata nauli, hata pasu-pasu napinasahat muna, pasauthon ma Tuhan Debata.

13) Marmutik ma inggir-inggir, marparbue tada-tada;

    Hata nauli, hata pasu-pasu napinasahat muna, sai anggiat ma attong dipasaut Tuhanta.

14) Aek marjullak-jullak, marjullak-jullak sian batu, Jullak-jullakna i pamasukon ma tu tabu-tabu;

    Hata pasu-pasu sian hamu hula-hula nami, Ampuon nami ma i martonga ni jabu.

15) Aek marjullak-jullak, marjullak-jullak sian holang-holang ni batu, laos pinamasuk tu tabu-tabu;

Hata nauli, hata tangiang napinasahat munai tu hami, Ampuon nami ma i martonga ni jabu.

16) Naung sampulu pitu ma jumadi sampulu ualu;

    Hata pasu-pasu sian hamu hula-hula nami, boanon nami mai martonga jabu.

17) Asa harbangan ma dalan tu huta, balatukma dalan tu jabu;

    Hata pasu gabe napinasahat muna, huampu hami mai hot martongani jabu.

18) Naung sampulu pitu jumadi sampulu ualu; 

    Angka pasu-pasu muna i sai hot ma i ditonga ni jabu.

19) Marandorma assimun, marparbue antajau; 

    Angka hata nauli naung pinasahat munai, ampuon nami mai hot martonga ni jabu.

20) Tuat si puti nangkok sideak;

    Ia i nauli ima tapareak.

21) Nunga lambok pusu-pusu, Sonang nang ate-ate ;

    Saluhutna holongni rohamu, hudok hami ma mauliate.

22) Pinauli sagu-sagu, binahen tu pinggan pasu; 

    Saluhutna holongni rohamu, hudok hami ma mauliate.

23) Sahat-sahat ni solu, sahat ma tu bontean;

    Leleng ma hita mangolu, Sahat tu parhorasan sahat tu panggabean.