UMPASA MANGAMPU PASU-PASU, MANGAPULI & MARSIRANG

 ANGKA UMPASA MANGAMPU ANGKA PASU-PASU NI HULA-HULA

1) Doding ni doding, doding ni Mandalasana; 

    Angka pasu-pasu muna i sai unang ma muba unang sesa.

2) Naung sampulu sada ma jumadi sampulu tolu; 

    Angka pasu-pasu muna i sai anggiat ma padenggan ngolu-ngolu.

3) Naung sampulu pitu jumadi sampulu ualu; 

    Angka pasu-pasu muna i sai hot ma i di tonga ni jabu.

4) Topi ni Aek Puli dalan tu huta Tonga-tonga; 

    Sai sahat ma pasu-pasu muna i, unang muba unang longa.

5) Songgop siruba-ruba tu dangka ni hapadan; 

    Angka pasu-pasu muna i sai dijangkon tondi ma dohot badan.

6) Mardangka jabi-jabi marbulung ia situlan; 

    Angka pasu-pasu muna i sai sude ma i dipasaut Tuhan.

7) Bulung ni taem ma tu bulung ni situlan; 

    Ba molo tarbahen sai topot hamu hami ganup bulan.

8) Ba molo so boi bulung situlan ba pinomat bulung salaon; 

    Ba molo so boi ganup bulan pinomat tolu hali sataon.

UMPASA DI TINGKI MANGAPULI

1) Ramba ni Sipoholon marduhut-duhut sitata;

    Las ni roha dohot sitaonon sude do i sian Amanta Debata.

2) Hau ni Gunungtua, dangkana mardagul-dagul;

    Tibu ma dilehon Tuhanta di hamu tua, jala tibu hamu diapul-apul.

3) Poltak bulan tula, binsar ia mata ni ari;

    Tibu ma ro tu hamu soritua, singkat ni soro ni ari.

4) Hotang binebe-bebe, hotang pinulos-pulos;

    Unang iba mandele, godang do tudos-tudos.

5) Hotang binebe-bebe, hotang ni Siringkiron; 

    Unang iba mandele, ai godang dope sihirimon.

6) Dolok ni Simalungun ma tu dolok ni Simamora; 

    Sai salpu ma angka na lungun, hatop ma ro silas ni roha.

7) Bagot namadungdung tupilo-pilo namarajar;

    Dao ma nalungun, sai ro ma na jagar tu joloan on.

8) Dolok ni Simalungun, tu dolok ni Simamora;

    Salpu ma sian hamu na lungun, sai hatop ma ro si las ni roha.

9) Bagol bogil, Bagol sohabalbalan;

    Salpu ma nahansit, Sai ro ma najagar tujoloan on.

UMPASA DI NA LAHO MARSIRANG

1) Pidong Sitapi-tapi habang diatas hauma;

    Horas ma hamu na hupaborhat hami, horas hami na tininggalhon muna.

2) Dolok ni Panampahan tondongkon ni Tarabunga;

    Sai horas ma hamu di pardalanan songon i dung sahat tu inganan muna.

3) Tombak ni Sipinggan di dolok ni Sitapongan;

    Didia pe hita tinggal, sai tong ma hita masihaholongan.

4) Eme sitambatua parlinggoman ni siborok;

    Amanta Debata do silehon tua, sai luhutna ma hita diparorot.

5) Mangerbang bunga-bunga, ditiur ni mata ni ari;

    Selamat jalan ma di hamuna, selamat tinggal ma di hami.