Mandok Hata Di Pergantian Tahun Manang Malam Tahun Baru

 Link Video Contoh Mandok Hata Di Pergantian Tahun Manang Malam Tahun Baru

Mauliate ma parjolo di pasahat rohanta tu Tuhanta pardenggan basa i, disiala denggan ni basaNa dohot asi ni rohaNa na tongtong mandongani hita saluhutna, gabe boi hita taripar tu taon na imbaru on manalpuhon taon naburuki.

Sai anggiat ma tutu di bagasan taon naimbaru on tontong pangaramotion ni Tuhan na mandongani hita di ganup Pargulmiton ni ngolunta. Dirajumi roha tutu dang tagamon so adong na hurang lobi diakka pangalaho dohot pakkuling ni iba maradophon hamu na nihaholongan, Ima di ompung ni iba, di natoras niba, di halak akkang niba dohot sude hita na dibagas on. Dibahen i salpuhon hamu ma i sude sian bagas ni rohamuna, unang gabe i mangambati parsaoranta tu joloan ni ari on. Asa anggiat ma tutu taon naimbaru gabe taon las ni roha, taon panjaloan pasu pasu jala taon dalanta rap mamuji pasangaphon Tuhanta i Attong asa dohonon ma songon nidok ni natua tua Demban do napuran naniatup ni boru ni raja, Molo adong angka pangalaho nalobi hurang ditaon naung salpu, talupahon ma i sian bagasan roha. Binsar mataniari, poltak mata ni bulan Manumpak ma antong Debata Mulajadi, sai ditambai ma di hita denggan ni parngoluan Mauliate

Read More

ANGKA UMPASA DI NA MARHATA SINAMOT SIAN PIHAK PARANAK

Link Video Angka Umpasa Di Na Marhata Sinamot Sian Pihak Paranak

a) Godang sibutong-butong otik sipirni tondi, tung sosadia pe na hupatupa hami sai pamurnas ma i tu pamatang saudara tu bohi.

b) Habang pidong halohalo didongani sitapi-tapi, las ma rohamu manjalo i dope na tarpatupa hami.

c) Sititi ma sihompa golang-golang pangarahutna, tung otik pe na hupatupa hami sai godang ma pinasuna.

d) Bulung ni dapdap langkop, ba i dope na adong ba ima taparhajop

e) Pitu lili nami paualu jugianami, na uli do nipi nami ai dijangkon borumuna do anak nami.

f) Sapala na mardalani unang ma olat ni sigalangan, sapala naung mangoloi boru muna unang ma diparalang-alangan, sai jalo hamu ma anak nami dongan ni boru muna sapanganan.

g) Inganan ma sibulu dolok ni Sitapongan, barani pe hami manjumpai hamu ndada ala godang ni sinadongan.

h) Barita ni lampedang, mardangka bulung bira, barita ni burjumu marboru tarbege do ro didia

i) Amporik marlipik onggang marbabang, gabe do parboli na otik gabe do nang parboli na godang.

j) Aek godang do aek laut, dos ni roha do sibaen na saut.

k) Balintang ma pagabe tumundalhon sitadoan, arinta ma gabe molo masipaolo-oloan.

Read More

Hata Mangampu Hasuhuton Uloan Dok Ni Roha

 

Mauliate ma tapasahat tu Tuhanta namartua Debata. Ala asi dohot holong ni rohana do boi hita marhahipason sahat tu tingkion nang pe hita dibagasan dok ni roha.

Mauliatema hupasahat roha nami tu hamu saluhutna tulang nami. Di holong ni roha muna, naung pinasahat muna tu hami saluhutna namardongan tubu. Balintang ma inna pagabe tumundalhon sitadoan. Arinami ma tutu gabe saluhutna. Ala tontong do hami namardongan tubu marsipaolo-oloan.

Angka siganjang umurma hamu tulang naburju. Asa adong muse maniro-niroi hami rajani pargellengon muna. Mangalean angka poda dohot angka hata sipaingot. Hatani natua-tua mandok.

Andor hadukkama togu-togu ni lombu. Andor hatitima togu-togu ni horbo. Penggeng saor matua ma hamu angka tulangku, hula-hulaku nang hita saluhutna amanta raja dohot inanta soripada. Sahat tu napatogu-togu pahompu. Sahat tu namarnini sahat tu namarnono.

Diangka saluhutna hata tangiang, hata pasu gabe, hata sipasingot naung pinasahat muna. Ampuon nami mai.

Asa horbo sitikko tanduk tu sisapang naualu. Parbutuha mangalilit parmata mangalu-alu. Dibalian mai attong marjampal dihuta marngalu-ngalu. Disaluhutna hata nauli, hata nadenggan, hata tangiang naung pinasahat muna tu hami saluhutna raja pargellengon muna. Huampu hami mai hot martonga ni jabu.

Asa sahat ma ninna solu sahatma tu bontean jonok tu tiga ras. Sahatma angka nauli nadenggan naung pinasahat muna dipartikkian on. Sahatma hita tu panggabean jala horas-horas.

Songonima hata naboi hupasahat hami tu hamuna saluhutna. Botima.

Read More