UMPASA DOK NI ROHA

 

1) Bagot namadungdung ma tu pilo-pilo namarajar;

Sai salpu ma sian hamu na lungun sai ro ma najagar.

2) Tombak ni Simalungun ma parsobanan ni Simamora;

Salpu ma angka nalungun sian hamu, sai ro ma silas ni roha.

3) Tubu hau parira didolok ni Simangonding;

Tung boha pe tua ni ama dohot ina, tongtong do lungun roha molo dung monding.

4) Ramba ni ni Sipoholon marduhut-duhut sitata;

Tung boha pe lungun ni sitaonon, tontong do ingkon pujion Tuhanta Debata.

5) Hotang ma binebe-bebe, hotang pinulos-pulos;

Unang hita mandele ai adong do tudos-tudos.

6) Tombak ni Simalungun ma tu tombak ni Simamora;

Sai hatopma salpu nalungun, jala tibu ma ro silas ni roha.

7) Tuak natonggi ma tu bagot sibalbalon;

Tung paetpe sitaonon ditingki nasalpu i, sai ro ma angka natonggi tu joloan on.

8) Tinapu bulung siarum bahen uram ni pora-pora;

Nahassiti tibu ma malum, jala tibu ma ro silas ni roha.

9) Asa hotma panutuan, manutu pulung-pulungan;

Hotma hamu di Tuhan asa tibu dapot parsaulian.

10) Pinaktikkonma hujur dijolo ni tapian;

Manang tudia pe hamu pomparan ni natua-tua on mijur,

Sai tongtongma hamu dapotan parsaulian.

11) Asa hotma panutuan, manutu pulung-pulungan;

Asa hotma hamu pomparan ni natua-tua on di Tuhan,

jala tontong dibagasan dame dohot marsihaholongan.

12) Eme sitamba tua ma parlimggoman ni siborok;

Debata do na martua, saluhut pomparan ni natua-tua naung jumoloon horasma diparorot. 

13) Balga tiang ni ruma umbalgaan tiang ni sopo;

Nunga gabe natua-tua naung jumoloon, unggabean ma angka pomparanna naumposo.

14) Eme sitamba tua ma parlimggoman ni siborok;

Debata do namartua, saluhut nama pomparan ni natua-tua naung jumoloon horasma diparorot.

15) Napuran tano-tano tu sarindan ni Pinasa;

Anggo badan i mulak do gabe tano, Jala tondi i mulak do tu nampunasa.

16) Timbo tiang ni rumah timboan do tiang nisopo; 

Nungnga tung ganjang umurni natua-tuaon, Sai lobi ganjangma umur ni pomparanna naumposo.

17) Banuarea godang hatubuan ni tumbur tua; 

Angka nametmet tibu ma imbur-imbur magodang, Angka natua-tua anggiatma saur matua.

18) Adong aek boluson molo lao tu Sibolga; 

Nadokdoki gabe neang do i parsanon, Molo adong dos ni roha.

19) Songon lote andolok na masijou-jouon; 

Molo adong na huranglobi dihamu, Dengganma hamu masianju-anjuan, 

Molo adong nagale ditonga-tongamu, Dengganma hamu masiurupan.

20) Sanggirgir ma ditobing silantom ditapian;

Manang didia pe hamu pomparan ni natua-tua on lao maringanan, 

Disima hamu gabe horas huhut dapotan parsaulian. 

1) Ndada simanuk-manuk sibontar andora;

Ndada sitodo turpuk siahut lomo ni roha.