Hata Sian Tulang Ulaon Pamasu-masuon & Adat Nagok

Ulaon namarlas ni roha diari nauli di bulan nadenggan di taon parasian on. Di hamu amang boruku. Nuaeng ro do hami dison pengurus ni punguanta. Hombar tu gokkon dohot jou-jou muna nasahat tu punguan. Ro do hami dison amang boru mamboan ulos nahapal, ulos naganjang, jala ulos sitorop rambu. Massai las  do roha nami huida hami ulaonta ditingkion amang boru. Tung massai tiur do songon mataniari rondang songon bulan.

Attong pininta ni ulos on. Hapalma jaloon muna amang boru angka panggabean parhorasan tu joloan ni arion. Ganjangma nang umurmu dinalaho marmudu-mudu pinomparmu. Tarlumobima di berenami naung tangkas manjalo pasu-pasu pardongan saripeon di tingkion. Asa dapotma songon hatani situa-tua:

“ Andor hadukkama ma togu-toguni lombu, andor hatiti togu-togu ni horbo. Penggeng saur matua ma hamu amang boru pairing-iring pahoppu sahat tu na marnini sahat tu na marnono dipasu-pasu Tuhan Debata. “

Ima hata pasu gabe sipasahaton nami di amang boru nami.

Jadi songonima di hamu bere nami dohot boru nami. Di naung ojak pasu-pasu pardongan saripeon muna sian bagas joro ni Tuhanta marhite naposona. Parhitean ni Tuhanta mai pasahatton pasu-pasui. Alai dohonon nami tu hamu dinaung ojak parruma tanggaon muna. Attong jangkon hamuna ma Tuhantai mian di tonga-tonga ni bagas muna. Asa diramoti jala dilehon dihamu roha dame nalaho mangalugahon parruma tanggaon muna.

“ Asa diginjang ma ninna arirang di toruma panggaruan. Pardongan saripeon muna attong naso jadi sirang. Tondi muna ma tontong marsigomgoman. “

“ Asa lomakma silinjuang lomak sobinaboan. Tung tudia pe hamu mangalakka. Sai tusi ma hamu dapotan pangomoan. “

“ Ruma ijuk paadop-adop ruma gorga. Sai tubuma di hamu anak partahi ulubalang dohot boru namora jala malo marroha. Dongan mu mai sahat tu na saor matua. “

Songonima hata pasu gabe naboi tarpasahat hami. Tuhantama namasu-masu. Mauliate

Read More

Hata Sian Tulang Ulaon Pesta Unjuk & Adat Na Gok

Jadi mauliatema diparsaoranta ditingkion, mauliatema nang di Tuhanta. Diari nauli dibulan nadenggan on. Tohoma tutu di lae nami, di naro gokkon dohot jou-jou muna diari naung salpu tu tonga-tonga ni punguanta. Tohoma tutu digokkon dohot jou-jou munai. Ido haroro nami ditingkion. Ido dihita lae dinamarpunguan. Sisada anak sisada boru do hita ditonga-tonga ni punguan. 

Di las ni rohani laeku, las do roha ni punguanta. Anggiatma attong amanta namartua Debata dipasu-pasuma saluhutna. Dileanma ganjang ni umur di laeku. Asa boi parmudu-mudu saluhutna angka berenami. Jadi songon hatani situa-tua ma dohonon nami:

“ Andor hadukkama ma togu-togu lombu, andor hatiti togu-togu ni horbo. Penggeng saur matua ma hamu laeku pairing-iring pahoppu sahat tu na marnini sahat tu na marnono dipasu-pasu Tuhan Debata. “

Jadi dihamu berenami. Tangiang nami anggiatma ruma tangga muna tujoloan ni arion gabe ruma tangga na berbahagia. Ingot hamuma hatani Tuhanta naung dipasahat marhite-hite naposona nangking. Pos ma rohamu molo sada do hamu mangalugahon parruma tanggaon mu. Nasai dapoton muna do pasu-pasu nabalgai sian Tuhanta. Hatopma attong dililiti andorna. Asa martamba-tamba silas ni roha di keluarga muna.

Jadi dison adongdo diboan hami songon ulos naganjang, ulos nahapal sitorop rambu. On ma tangiang ni punguanta. Pinta-pintata tu amanta namartua Debata. Anggiatma songon ganjang ni ulosonma ganjang ni umurmu tu ari marsogot. Hapalma attong jaloon muna pasu-pasu sian Tuhani. Torop rambuna. Asa sitorop pinomparma hamu tu joloan ni arion. Jadi songon hatani situa-tua ma dohonon nami tu hamu:

“ Ranting ni arirang peak di tonga ni onan. Badanmu naso sirang, tondi muna ma marsigomgoman. “

“ Asa pinaktikkon ma hujur di topi ni tapian. Tudia pe hamu mangalakka tusima hamu dapotan parsaulian. “

“ Asa sahat-sahat ni solu sahatma tu bontean. Pasahaton namima ulos sian tonga-tonga ni punguanta. Sahatma hamu tuparhorasan, sahatma hamu tu panggabean. “

Songonima hata naboi hupasahat hami. Mauliate.

Read More

Mandok Hata Pasahat Ulos Tujung

Dihamu ito. Dipaporsanhon Tuhanta do tu hamu nuaeng sada sitaonon nadokdok. Huantuasi hami do ito, tung mansai borat do sitaonon on tu hamuna songon udan na so hasaongan, songon alogo na so hapudian. 

Alai ingot hamu ito, ndada holan hamu mamorsan nadokdok i, dohot do nang hami hula-hula muna. I ma umbahen na ro hami nuaeng mandapothon hamu tuson laho mambahen tujung muna. 

Simbol manang tanda do on ito, paboahon tu hamu na adong do hami hula-hulamuna na mangkaholongi hamu. 

Nuaeng ito jalo hamu ma tujung on. ( Ditunjungkon ma ulos i tu atas simanjujung nasida, jala diuduti hatana ).

Jadi ito, songon ulos tujungi naung ampe nuaeng di simanjujungmuna Songon i ma dohot holong ni roha nami dohot tangiang nami, mandongani hamu dohot angka berenami i sude. Angkup ni i, ingot hamu ito, hatani Tuhanta na mandok : 

“ Ahu do ama di angka namabalu dohot diangka dakdanak na so marama ”

Jadi na mabalu na olo manjalo jala manghaporseai hata i ndang pola be mabiar manang ganggu di hangoluan siapari. Ai Tuhanta ido silehon i sude. On pe ito, sai hipas ma angka berenami i. Songoni nang hamu sai hipas sahat tu na sarimatua patureture nasida.

Botima.

Read More

UMPASA DI NA MARHATA SINAMOT

 Link Video Youtube UMPASA DI NA MARHATA SINAMOT

" Sande sige tu bungkulan ni sopo, bangkona do manise molo sobinoto.
Dia ma nuaeng langkatna dia unokna, dia ma nuaeng hatana dia nidokna "

Horasma Jala Gabe. Gabema Jala Horas

Read More