UMPASA SIDOHONON MOLO DOHOT IBA MANGADOPI NATUA-TUA NA MANJALO SIPANGANON SIAN ANGKA ANAKKONNA

 

HATA TU NATUA-TUA I SIAN ANGKA ANAKKONNA:

1) Andor hadumpang ma togu-togu ni lombu dohot togu-togu ni horbo laho tu Lapogambiri;

Sai saur ma hamu leleng mangolu paihut-ihut pahompu sahat tu na marnini dohot marnono.

2) Tinapu bulung ni sabi nibutbut pinaspashon; 

I dope na tarpatupa hami ba i ma jolo tahalashon.

HATA SIAN UNDANGAN TU NATUA-TUA:

1) Poltak bulan i Ama ni Manggule;

Ro nuaeng angka pomparanmu mamboan sipanganon ba dohot hami maulae.

2) Tubu ma singkoru di dolok ni Simamora;

Sai torop ma anak dohot boru na basa jala sisubut roha.

3) Tubu dingin-dingin jonok tu simartolu;

Horas ma tondi madingin pir tondi matogu;

Sai ro ma nipi nauli sai leleng hamu mangolu.

Haliangan ni nono dohot nini raphon anak dohot boru.

HATA NI UNDANGAN TU IANAKKON NA MAMBOAN SIPANGANON:

1) Binolus Purbatua laho tu Parsingkaman;

Naburju marnatua-tua ingkon sai dapotan pandaraman, 

Laho pe ibana mangula sai nadao ma parmaraan, 

Sai dapotsa na niluluan sai jumpang na jinalahan.

2) Taringot di sipanganon na binoan muna tu natua-tua:

Disi do gandina, disi do nang gandona;

Disi do daina disi do nang tabona,

Sirsir ansimna jala hona dohot asomna.

3) Asa dohononnami ma :

Bagot na marhalto ma di ladang ni Panggabean;

Horas ma hami na manganhon, lam martamba sinadongan di hamu na mangalean.

4) Ia siula tano do hamu ba on ma dohonon nami:

Binanga ni Sihombing binongkak ni Purbatua;

Tu sanggar ma amporik tu lombang ma satua; 

Sai sinur ma pinahan gabe na niula.

5) Molo partiga-tiga do hamu ba on ma dohonon nami:

Tinampul bulung bira bahen saong laho tu ladang;

Sai mangomo ma hamu sian tiga-tiga, ba sai maruntung ma sian dagang.

6) Molo tung sipata rugi hamu ba sai dapot nian nidok ni umpasa:

Soban ranting-ranting soban ni Sijamapolang;

Ba molo rugi hamu sian anting-anting, ba sai mangomo ma sian golang.

7) Molo pegawai do hamu ba on ma dohononnami:

Tinapu bulung salaon dongan ni bulung situlan;

Bai sai naek pangkat ma hamu ganup taon, sai tamba gaji tiap bulan.

8) Molo adong sian hamu na so hot ripe dope on ma dohonon nami:

Parik ni Lobutua hatubuan ni bulu duri;

Naburju marnatua-tua sai ingkon dapotan rongkap na uli.

9) Molo adong disi huling-huling sai adong ma disi nang holi-holi; 

Molo adong disi na so muli sai adong do rongkap ni i naso mangoli.

10) Sahat-sahat ni solu ma sahat di rondang ni bulan; 

Sai leleng ma hamu mangolu jala sai dipasu-pasu Tuhan.